Taan muštottemčáállus ulmen lii pyehtiđ algâaalmug sämmiláid lahtojeijee vuoigâlâšvuođâkoččâmušâid já taid vaigutteijee tahheid savâstâlmân. Muštottemčáállus puáhtá ávhástâllâđ šoŋŋâdâhpolitiiktooimâi vuáváámist já tai vaiguttâsâi sämikulttuurân árvuštâlmist. Muštottemčálusist 1) ráhtoo ubâlâšvaldâlem šoŋŋâdâhnubástus vaiguttâsâin sämikulttuurân šoŋŋâdâhvuoigâlâšvuođâ keččâmkuávlust, 2) oovdânpuáhtoo tehálumos sämmiláid já šoŋŋâdâhpolitiik vuoigâlâšvuotân vaigutteijee lahâasâttem, 3) puáhtojeh oovdân kuávdášliih
šoŋŋâdâhvuoigâlâšvuođâ árvuštâlmân lahtojeijee almugijkoskâsiih já aalmugliih algâaalmugij vuoigâdvuođáid lahtojeijee tábáhtusah, 4) analysistoo šoŋŋâdâhpolitiik vuoigâlâšvuotâ algâaalmug sämmilij tááhust sehe analysistojeh šoŋŋâdâhpolitiik vuoigâlâšvuođâ árvuštâllâmkoččâmušah sämmilij tááhust. Čáálus lii Suomâ šoŋŋâdâhpaaneel Ilmastopolitiikan oikeudenmukaisuus (“Šoŋŋâdâhpolitiik vuoigâlâšvuotâ”) -haavâ uási. Haavâst lii čielgâdum, maht šoŋŋâdâhpolitiik vuoigâlâšvuođâ puáhtá árvuštâllâđ kulmâ ooláádmudo peht: juáhu-, tubdâsteijee já monâttâllâmvuovij vuoigâlâšvuotâ. Vuoigâlâšvuođâ árvuštâllâm vuolgâsaijeen láá vuáđu- já olmoošvuoigâdvuođah (Kivimaa je. 2023).
Muštottemčáálus vuáijoo tarkkuustâllâđ sämikulttuur já šoŋŋâdâhpolitiik vuoigâlâšvuođâ Suomâst sämmilij päikkikuávlu já Taažâst já Ruotâst sämmilij ärbivuáválij aassâmkuávlui raajij siste. Šoŋŋâdâhtooimâin láá vuoigâlâšvuođâvaiguttâsah meiddei päikkikuávlu ulguubeln ässee sämmiláid. Vuoigâlâš šoŋŋâdâhpolitiik puáhtá máhđulávt coggâđ sämmilij meddâlvarrim päikkikuávlust tâi tuárjuđ maasâd varrim sämmilij päikkikuávlun, mutâ taan olesváldálâš árvuštâllâm váátá sierâ tutkâmhaavâ já amnâstuv čokkim.