Tän mošttõspõʹmmai mieʹrren lij puʹhtted saǥstõõllmõʹšše alggmeer säʹmmlaid kuõskki vuõiggvuõđmeâldlažvuõttkõõččmõõžžid da tõid vaikkteei tueʹjjeeʹjid. Mošttõspõʹmmai vueiʹtet äuʹǩǩeed ko plaaneet äimmõspoltiikktååimaid da ko ärvvtõõlât tõi vaikktõõzzid sääʹmkulttuuʹre. Mošttõspõʹmmjest 1) raajât takaikõvvõõzz äimmõsmuttâz vaikktõõzzin sääʹmkulttuuʹre äimmõsvuõiggvuõđmeâldlažvuõđ ǩiõččâmvueʹjjest, 2) čuäʹjtet kõskksaž säʹmmlaid da äimmõspolitiikk vuõiggvuõđmeâldlažvuõʹtte vaikkteei lääʹjjšeâttmõõžž, 3) pooutet ouʹdde kõskksaž äimmõsvuõiggvuõđmeâldlažvuõđ ärvvtõõllmõʹšše õhtteei meeraikõskksaž da meerlaž alggmeerai vuõiggâdvuõđid õhtteei šõddmõõžžid, 4) analysââʹstet äimmõspolitiikk vuõiggvuõđmeâldlažvuõđ
alggmeer säʹmmlai ǩiõččâmvueʹjjest di analysââʹstet äimmõspolitiikk vuõiggvuõđmeâldlažvuõđ ärvvtõõllâmkõõččmõõžžid säʹmmlai ǩiõččâmvueʹjjest. Ǩeʹrjjtõs lij vueʹss Lääʹddjânnam äimmõspaneel Äimmõspolitiikk vuõiggvuõđmeâldlažvuõtt -haʹŋǩǩõõzz. Rapoortâst analysââʹstet äimmõspolitiikk vuõiggvuõđmeâldlažvuõđ tuʹtǩǩummušǩeerjlažvuõđâst valddum kolmm jeeʹres vuõiggvuõđmeâldlažvuõđ vuälvuõđ mieʹldd; distributiivlaž, sosiokulttuursaž da mõõntõõllâmnaaʹli vuõiggvuõđmeâldlažvuõtt. Vuõiggvuõđmeâldlažvuõđ ärvvtõõllâm vueʹlǧǧemsââʹjjen lie vuâđđ- da ooumažvuõiggâdvuõđ (Kivimaa dj. 2023).
Mošttõspõʹmmjest čiŋlmõõvât tõõzz, što täʹrǩstõõlât sääʹmkulttuur da äimmõspolitiikk vuõiggvuõđmeâldlažvuõđ nuʹtt, što tõn rajjeet Lääʹddjânnmest säʹmmlai dommvoudda da säʹmmlai äʹrbbvuõđlaž jälstemvuuʹdid Taarâst da Ruõccâst. Äimmõstååimain lie vuõiggvuõđmeâldlažvuõttvaikktõõzz še doʹmmvuuʹd åålǥbeäʹlnn jälsteei säʹmmlain. Vuõiggvuõđ meâldlaž äimmõspolitiikk vuäitt še vueiʹtlvânji tuõʹllʼjed säʹmmlai seʹrddmõõžž meädda dommvuuʹdest leʹbe nââneed mäccmõõžž säʹmmlai dommvoudda, leâša tän obbkoov ärvvtõõllmõš õõlǥat jeeʹrab tuʹtǩǩeemhaʹŋǩǩõõzz da aunstõsnoorrmõõžž.